Dan Warchae

£9.99

Achos cythryblus arall i’r Ditectif Jeff Evans yn nhref arfordirol Glan Morfa – y bymthegfed nofel dditectif i John Alwyn Griffiths ei hysgrifennu.

Broliant

Mae ceiswyr lloches yn cael eu lletya mewn hen wersyll yn perthyn i’r fyddin ar gyrion Glan Morfa, ac mae protestiadau yn lleol ynghylch y sefyllfa. Pan gaiff merch ifanc leol ei threisio mae’r amheuaeth yn disgyn yn syth ar y tramorwyr, a chynyddu mae’r tensiwn yn y gymuned. Ceisia Jeff Evans a gweddill plismyn Glan Morfa lonyddu’r dyfroedd, ond yna caiff corff un o swyddogion diogelwch y gwersyll ei ganfod...

Awdur

Mae John Alwyn Griffiths yn enedigol o Fangor, ond mae bellach yn byw ym Môn. Mna eweid ysgrifennu hunangofiant, Pleserau’r Plismon, a phedair ar ddeg o nofelau ditectif.

Lleoliad/cynulleidfa

Mae gan yr awdur gynulleidfa eang eisoes, a bydd y nofel hon yn addas iddyn nhw a darllenwyr newydd.

Adolygiad gan Marlyn Samuel

Teg yw deud bod John Alwyn Griffiths yn un o’n hawduron mwyaf cynhyrchiol yn y genre nofelau ditectif Cymraeg. Ers blynyddoedd bellach, cyn y Nadolig, mae yna hen edrych ymlaen am nofel newydd gan yr awdur. Yn ei nofel ddiweddaraf, Dan Warchae, y bymthegfed yn y gyfres ynglŷn â’r ditectif Jeff Evans, ni fydd ei ddilynwyr yn cael eu siomi.

Fel mae un cymeriad yn y nofel yn ei ddatgan sy’n wir, “ Mae ardal Glan Morfa i weld fel tasa hi’n fagnet i droseddau treisgar.” Dim gormodiaith ydi deud hynny, ac unwaith eto mae Jeff Evans yn ffeindio’i hun yn ei chanol hi.

Cefndir y nofel ydi bod yr hen wersyll sy’n perthyn i’r fyddin ar gyrion tref Glan Morfa yn cael ei defnyddio fel llety ar gyfer ceiswyr lloches. Achosa hyn gryn dyndra a gwrthdaro yn y dref gyda llu o brotestiadau yn lleol ynghylch y sefyllfa. A phan geir ymosodiad ar ferch leol, mae’r amheuaeth yn disgyn yn syth ar y tramorwyr ac mae’r tensiwn yn cynyddu. Mae Jeff Evans a gweddill plismyn y dref yn ceisio tawelu’r dyfroedd ond mae’r sefyllfa’n gwaethygu pan mae corff un o swyddogion diogelwch y gwersyll yn cael ei ganfod.

Fel yn ei nofelau blaenorol, mae John unwaith eto yn trin a thrafod materion a phroblemau cyfoes ac amserol sy’n digwydd yn y byd go iawn. Y tro hwn effaith ceiswyr lloches yn symud i mewn i’r ardal ac effaith hynny ar y gymuned a geir. Ymdrinnir hefyd â’r broblem gynyddol o gyffuriau anghyfreithlon sy’n dod yn fwy a mwy o broblem yn ein cymunedau.

Os nad ydych chi wedi darllen y nofelau eraill, peidiwch â phoeni, mae’r nofel yma’n sefyll yn gadarn ar ei thraed ei hun. Mae’r awdur yn cyflwyno digon o gefndir i ni am y cymeriadau sy’n ailymddangos . Ac ydi, dwi’n falch o ddweud fod Nansi’r Nos yn ymddangos yn y nofel yma hefyd.

Fel cyn-dditectif ei hun, mae gan John adnabyddiaeth drylwyr o ddulliau'r heddlu o weithredu ac mae hynny’n rhoi hygrededd i’r stori. Mae’r nofel yn symud yn ei blaen yn rhwydd ac yn ddarllenadwy iawn a’r penodau byr yn cadw diddordeb y darllenydd .

Ceir sawl tro a llinyn i’r plot ac mae pob un yn dod at ei gilydd yn gelfydd ar ddiwedd y nofel. Ac un peth dwi yn eich sicrhau chi: ar ôl i chi ddarllen y diweddglo mi fyddwch chi’n ysu i John gyhoeddi nofel arall yn y dilyn hynt y ditectif Jeff Evans.

Mae hon unwaith eto’n glincar, yn llawn trais, dirgelwch a chyffro. Yn wir, mae John yn feistr ar y nofel dditectif Gymraeg. Byddai ei nofelau’n addasu’n wych ar gyfer cyfres dditectif apelgar ar S4C. Yr hwn sydd ganddo glustiau i wrando, gwrandawed.

ISBN: 9781845248024
Awdur: John Alwyn Griffiths
Cyhoeddi: Tachwedd 2026